صلوا على المختار وتعالوا نكمل هرجتنا ...
في الملكة
واواو ا يش الحلاوة والجمال ايش السحر غزالة والا ملاك ..تجنننننني يا سوسو .
بعدين معاك يا سعيد لا تحرجني ..هات يديك بس دا يوم المنى
يالله يا سعيد لبس مرتك الدبلة خليني نفرح ..ويا جماعة لبستها ما ني عارف وين أحط الخاتم قعدت أبصبص في أصابعها عجبتني بصراحة كفوفها وبياضها وملمسها الطري زي القطنة... والا أمي تفجعني بصوتها يا ولدي فشلتنا يالله دخل الخاتم , وأجي وأدخله في الإصبع الصغير وطلع كبير دخلته في الوسطى.. فرقزت أمي عيونها قلت خلاص فهمت وشوية إلا سوسو تهرجني ..سَعُودّي مو هنا... هنا حطه في دا الإصبع , قلت هاه ..طيب كان قلت لي يا بنت الناس بدل الفضايح والا الزغاريد تملأ المكان والكاميرات شك شك قلت شكلك مهم يا سعيد والله ما عمرك أحد صورك كدا يالله افرح واضحك ويومها الضحكة من هنا لهناك متر ونص بس وخلصنا الحفلة الحلوة وقالوا يالله قلت فين قالوا البيت , لا يا عالم ارحموني أشوف الجمال دا كله وأروح فاضي , الا أمي تضرب كتفي معليش يا ولدي العرس ما هو بعيد وأهو حتلحق تكلمها بعدين امشي دحين .
ماني ماشي خلوني شوية , قلنا امشي خلاص قعدت كفاية معاها , طيب يا أمي لفة في الحمراء , حمراء إيش يا مغفل تبغى عمك
يبطل احمد ربك إنه سمحلك تجلس لوحدك معها , لوحدي يعني حيتمنن عليّ دي جوزتي دحين وأتحكم فيها .
أقول امشي لا يجيك كلام يسم بدنك .
طيب يالله يا قمر حكلمك بعد شوي لا تنامي .
حستناك سَعُودّي .
يا ويلي قالت سَعُودّي ..ألحقوني يا هوووه .
ــــــــــــــــــــــــــــــــــــــــــــــــــــــــــــــــــ
مكالمة بعد شهر ...
- مساء الفل
- مساء الرياحين كيفك يا وحشة
- انا اللي وحشة والا أنت ..فين غايب عني هالمدة كلها
- ياستي ما ني غايب المسالة كلها 24 ساعة غبتها عنك انشغلت مع السوق والتجهيزات مانت عارفة باقي شهر ونلتقي زواجنا سريع وقياسي
- ايوه ..بس حتى ولو تغيب عني كدا ولا رسالة ولا كلمتين بلاش زيارة يعني
- على راسي يا سوسو بس اصبري اليوم... وبكرة أنا عازمك في مطعم مميز ما حتنسيه طول حياتك
- ليه مش حزوره مرة تانية والا إيه ؟!
- لا لا..قصدي ما حتنسي شوفته هالفترة وبعدين أوديك مكان ما تبغي
- حَسّبْت ما حتوديني ..أقلك يا روحي مر على صاحب المطابخ خليه يغير المسكات يعملها أشكال سكاكين وملاعق وشوك قعدت
أتخيلها ما عجبتني - ليه يا حلوتي ما حيرضى دي ثالث مرة نغيرها الرجال حيطفش مننا
- مالي دخل المطبخ تبعي وحيكون بكيفي
- طيب ..حاضر ..اللهم طولك ياروح
- ايش قلت
- سلامتك ..انت كل الروح
- طيب طول عمرك بكاش وتضحك عليّ يارب بس دايما تضحك علي بالكلمتين الحلوين هدولَ
- حغرقك بس انتظري
ــــــــــــــــــــــــــــــــــ
- مرحبا ابو حميد
-ايوه هلا سعود
- سعود انت كمان حتطلع ..المهم كيفك أبغى أشوفك اليوم
أصلي طهقان وخلقتي مليانه
- خير ايش بك دا أنت في أحلى ايام ...فيه حد قدك يامملك
- اول الايام عسل ودحين لما مسكتني صايرة عفريتة آآخ بس ..البنت دي حتطلع لي قرون كل شئ يتغير ويتبدل ..دا انا غلبان يا بو حميد
- يا بويا اصبر شوي عليها وبعدين خذ حقك كله اسالني بس
دي ما حتقدر تتكلم بعدين بالقوة دي
- لا يا بوحميد ما تعرفها انت ...لسانها اطول منها
- وايش اللي غاصبك تستمر معها ...
- تجنن خلقها ربي جميلة تفتن من صغري وهي أمنيتي ..حصبر عليها قد ما أقدر
- طيب ألاقيك اليوم في الكافيه بتاعك الساعه 9 لا تتأخر وراي مشاوير أم العيال
- ههههه حتى أنت خايف من وراي طيب ..طيب
شكله ما حد ناجي من دولا الحلوين :)...
وقبل عرسي يا جماعة الخير كانت حكاية كشتي مع أمي ..
تابعوني وإن شاء الله حتغرقوا في دموع الضحك
6:11:00 ص |
Category:
قصص قصيرة
|
0
التعليقات
Comments (0)