سعيد النعسان ...
أعرفكم بنفسي بداية علشان ما تنسوا بتقروا حكاية مين .
أنا اسمي سعيد النعسان ..أعرف ان اسمي ظريف وحتكون هرجتي معكم بالعامية الفصيحة يعني بالبلدي الفصيح يعني يا جماعة زي ما تقروا افهموا .
ولو شئ صِعب عليكم أهي قلب النسايم بين إيديكم إفتكوا بيها وإسألوها ما حتقصر معاكم غصبا عنها كمان .
طيب نرجع للب الكلام ..
أنا زي ما قلتلكم اسمي سعيد النعسان وطبعا انتو ضحكتوا كتير من اسمي عشان نعسان بس أنا حقلكم السبب وأريح عقولكم .
يقولوا وهما المسئولين وأنا برئ من اللي قالوه إن اسمي على اسم جدي سعيد الله يرحمه ويرفع مكانته ...
كان جدي سعيد بيحب السفر مرررة وكانت تنقلاته ياجماعة ما هو بالجيب
وإلا البي إم دبيليو ..لا يا حبايبي كانت بالحمير الله يعزكم وكل اللي حتحكوا له القصة دي .
مرة من المرات كان مسافر على حماره وشكله نعس شوية وطاح من فوق الحمار قاموا ضحكوا عليه جماعته اللي معاه في السفرة وسموه سعيد النعسان وطبعا أبويا يحُب جَدُه كتير فقرر يسميني الاسم المركب دا سعيد النعسان , بس أنا أحسن من جدي بكتير لأني مفتح ولي أربع عيون وحتشوفوا كيف بعد كل الحكايات اللي حتعرفوها عني أني بأربع عيون .
دحين اطمنتوا شوية خولنا نخش في العميق أكيد تعرفوا تسبحوا :) دمي خفيف مش كدا ..
والله يا جماعة أنا بقولكم سيرتي عشان تنبسطوا شوية ما أنا عارف أن الأزمات
طفشتكوا وطلعت ريحتكم ..وما عاد ينفع لا ترويشة ولا غيرها .
كلكم أكيد تعرفوا جدة القديمة يا إما من الصور أو التلفزيون أو من الكتب أو أي طريقة توصل المعلومات ليكم .
جدة القديمة آه منها ...حاجة ما حصلت ...مليانة زكريات محمد وأحمد وعم فتحي والبليلة وكبدة البلد وعمي العمدة وأشياء كتير
كانت أحلى زكريات الشباب وأنا لِسَّاني شباب برضه ما تغركم الكم شعره البيضا دولا اللي طالعين ..
ما أبغى أطفشكم بسيرة حياتي كلها وخليني أحكي لكم فترة ما قبل السجن الدهبي قصدي القفص الدهبي وكيف انحدفت قصدي
انتقلت للحياة الجديدة .
بس اسمعوني وفتحوا معايا شويتين عشان ما حعيد هرجتي تاني .
اتفقنا ...قولوا اتفقنا عشان أكمل ...
1:13:00 ص |
Category:
قصص قصيرة
|
8
التعليقات
Comments (8)
هههه اتفقنا بس اهم شي كملي
بدايه جميله..
جاري الانتظار..
ام حامد
جميل هذا السيد النعسان .....اتفقنا ومتابعون
خالص الود
عائشة
يا هلا بك ام حامد
الحمد لله ان راق لك نعساننا وستجدي الضحكة مع حكايته رغما عنك
ما دمنا قد اتفقنا يا صديقتي عائشة فإلى الامام سر
اسعدتني بمرورك ومتابعتك
اتفقنا
خوخه
اهلا خوخة
ازداد فرحا عند عبورك يا جميلة
وما دمنا قد اتفقنا فالامر حسن
اتفقنا..!!
متابعٌ لسلسلتك الشيقة.
سعيدة بمتابعة استاذي المبدع محمد الفيفي
وشرف لي زيارتك هنا وتواجدك
اهلا بك سيدي دائما