مرحببن بكم يا كل اللي حبيتوا قصتي ودحين صلوا على أحمد ...

بعد الحوسة بتاعة المشروع المنيل دا قالت امي 

شوف يا ولدي  يا سعيد ..ايش رايك اجوزك بنت  عمك سارة دي بنت زي القمر ..تقوله

غيب وانا اجي بدالك

لا يا ست الكل كله الا سارة ..

دي شقية ولسانها مترين نسيتِ كيف كنا نتضارب انا وهِيَ

ههههه يا ولدي دي عقلت وانت عقلت وربنا حيفتها في وشكم

" يفتح ايه يا امي لا تفجعيني بس كله الا وشي "

طيب بس ابغى اشوفها الله يخليكم يمكن شئ تغير ما يعجبني

 خلاص نكلم ابوك ..ويسأل عمك

شكلها ياامي حتكون حوسة 

يالله نصبر واهي الدنيا تجارب برضه وامتحانات 

يوم الشوفة ..يا حبايبي 

 يالله يا ولدي اسرع ايش بك تتمشى قاعد ..ما انت عارف عمك وعجلته دا كل شوية بيتصل

 هههههه بيتصل ليه  مو انا العريس والا هما

 اختشي يا ولدي ..دا عمك  برضه

 طيب على بركة الله مشينا 

 استنوا شوية نسيت النظارة

 امشي ايش تبغى بها

 عشان اشوف سارة كويس اخاف اضيع شئ من ملامحها يابويا 

 والله انك مسوي نفسك  لزيز يا تقل دمك بس امشي قدامي ودفني ابوي بعضلات يده ماشاء الله باقي فيه

قوة  امي ما غلقته لسى 

 طيب يا ابوي بس حبيت اضحكك ..كم حنقعد نتفرج ؟

 تتفرج على ايه جاتك البلا ..انت رايح تشوف البنت خمس دقائق و بس  ما انت رايح سينما.

ايش يمديني اشوف بس خمس دقايق حرام عليكم ..

يعني اطلع والا انزل 

والله انك قليل ادب يا ولد ... صحيح ما ربتك امك

 نعم انت كمان ما ربيته حتيجي عليَ دحين هو ولدي بس دا احنا اشتركنا في تربيته

يا سلام يا دنيا ابوي وامي بيتخاصموا عشاني .. ههه دا انا مهم مرة 

 اقولكم عشانكم مش حشوف حغمض بس فضوها  يعني حتنكدوا علينا 

 ..يالله وصلنا انزلوا بالسلامة .

السلام عليكم يا بو احمد كيفك يا خويا ..ان شاء الله الصحة تمام .

 ايوه الحمد لله ...كيفك يا سعيد اكيد متشوق تشوف مرتك

مرتي لسى ياعمي ما وافقت

 ايش جي تلعب

لا لا لا قصده  ما قبلت هِيَ ..سعيد يا بو احمد  تعرفه دمه لزيز مرة 

 احسب  ...ثواني واناديها لكم

 تعالي يا سارة سلمي على عمك ابو سعيد وجوزك  وشربيهم شرباتكم

 حاضر يا بويا ..

وعلى الحياء مِشْيَت  الحلوة وقربت بالعصير يا جماعه وانا ببحلق فيها من اولها لاخرها لما انكسفت

وكبت كاس العصير على توبي وقلت اهي دي اللي ابغاها ..وبعدين قلت ولا يهمك يا حلوة  فداك كل شئ

حتى توبي الغالي دا .

طبعا هي انكسفت واحمرت خدودها وهي تبارك الله فلقة قمر زي ما قالت امي ..

طالعتني بعيونها  الساحرة  وقالت اسفة سعيد ويومها دُبْت  ما تتخيلوا لما سمعت اسمي  والله كأني اول

مرة اعرف اني سعيد   واسمي حلو كدا.

حمحم ابوها يعني عمي و غمغم ابوي  وراحت الحلوة من قدامي وانا مبحلق وشوية لعابي حيسيل ..

قال عمي اقعدوا تعشوا فرحت كتير لكن ابويا الله يهديه قال له مرة تانية .

في السيارة  يكلموني وان مش وياهم  ينادوني وانا مش معاهم افكر في الطلة الحلوة

دي متى حلتقي فيها .

ضحك ابويا وغمز امي وقال شفت الولد راح فيها ..

وشوية الا يصرخ فيي يا ولد ..ايش قلت عجبتك والا لا , ايه يا بويا الا عجبتني دي جننتني  .

دا انا اول مرة اعرف ان  بنات عمي حلوين كدا حسبتهم مقاريد زي  خواتي

ياللي ما تستحي  كبرت خلاص ..خواتك زيك وازا كانوا مقاريد يعني انت واحنا قرود

ما شي قرود كلنا عند سارة .

يالهوي دي خطفت عقلك من ثواني يا فجعتي لا تاكلك كلك بعدين

خليها يامي تاكلني والا  تنقنق عليّ مو مشلكة .. المهم متى الملكة اسرعوا بالله

يالقافتك بس استنى يوافقوا واحنا  نتفق بعدين 

وحتعرفوا الباقي الاسبوع الجاي زي اليوم دا اصلو قلب النسايم بتتحكم فيا وفغصتني فغصة قال ايه

بترتب شوية لكن معليه حصبر وانتو اصبروا لما نلتقي ..

ادعولي كتير يا جماعة




Comments (4)

On 24 سبتمبر 2011 4:32 م , غير معرف يقول...

ههههههههههههه الله يتمم له خير
ننتظر التكمله
ام حامد

 
On 24 سبتمبر 2011 5:08 م , الكاتبة والقاصة / فاطمة البار يقول...

هلا فيك صديقة المدونة الدائمة
ام حامد
ان شاء الله يفرح سعيد وينبسط
كوني بالقرب

 
On 25 سبتمبر 2011 4:43 ص , محمد بن مسعود الفيفي يقول...

متابع ربي يسعدهم ويتمم بخير!,

 
On 25 سبتمبر 2011 6:23 ص , الكاتبة والقاصة / فاطمة البار يقول...

شرف لي متابعتك استاذ محمد

اهلا بك ابدا