صباحكم أحلى من مساكم ومساكم أطيب من صباحكم , يعني كله حلو
اليوم يا صحابي ححكيكم قصة القلب الناطق أصلي مرة كنت قاعد بفكر إيش اللي ممكن يحصل يا سعيد لو كنت بتسمع كلام الناس اللي بينقال في قلوبهم يا ترى حستمع إيه وسرحت في الفكرة و سبحت في عالم غريب
كنت جالس في مكتبي وإلا يدخل علي الفراش عم محمد و جاب لي الشاي , قلت شكرا يا أطيب مخلوق ابتسم لي و قال والله أنت 
الطيب يا ولدي يا سعيد , و هو رايح إلا أسمع صوت من جو قلبه يقول بكل وضوح الله يقلع خلقتك بس تراك قرفتني ما صبرني عليك إلا البخشيش ..بحلقت فيه وقلت بخشيش ايه يا عم محمد! قال بسم الله أنا ما قلت شئ ..قلت ما قلت شئ طيب طيب وخرج من عنديمفزوع .
ومضي الوقت وبعدين طلبني المدير لشغلة مع زميل لي وجينا عنده قال طبعا أعرف أنكم أكثر اثنين مخلصين و زمالتكم ينضرب فيها المثل , قلت ولو أستاذ عبدالله من أفضل من عرفت , رد عبدالله طبعا أنا وسعيد أكثر من إخوان وشوي إلا أسمع صوت قلب عبدالله يقول متى يجي اليوم اللي أفتك منك يا سعيد , و اختلط معه صوت المدير والله إنكم زي بعض مهابيل لكن إيش أعمل مضطر ...!
رديت ليه مضطر يا مديرنا شوف غيرنا ! بحلق إيش تقول قاعد !! أنا تكلمت وإلا شئ , بعدها التفت لعبدالله و قلت دا أنا بتمنى لك زي اللي بحبه لنفسي كذا أخرتها تفتك مني ..صرخ عبدالله مش ممكن كيف سمعت .
خرجت وحالي يقطع القلب وقلت حخرج من الدوام و قدمت عذر و خرجت وصلت السيارة و لقيت العامل خلص غسيل قلت أتأكد ...
خلاص كل شئ تمام ؟ قال : بابا كله ميه ميه وإلا اسمع قلبه يقول :ههه بابا أنت ما في معلوم هذا عشره ميه ... أنا ما في غسيل أنا بس شغل مسح بس ..مسكته من هدومه أهو أضعف واحد ألاقيه : نص كم يعني شغل عشرة ميه طب روح خذ حقك ما أبغاك تغسل تاني ..المسكين قال : بابا أنت فيه اسمع قلب مالي ..قلت مالك ومال الجيران كمان .
حسيت يا جماعة بإرهاق شديد و عرق جبيني من الهم ذا معقول الناس بوجهين كذا !!
وصلت البيت وقلت يالله سوسو حتريحني وناديتها أدور عليها , شوي إلا أسمع هرجتها بالتلفون تكلم أمها دخلت وسلمت ...ردت السلام وهي تقول هلا وغلا بزوجي الحبيب وشوي يا جماعة أسمع قلبها يقول أف إيش اللي جاب الهم دا .. دحين وقتك كيف أحش عليك وآخذ راحتي ..
بحلقت وسكت وقلت سلمي على ماماتك , قالت من عيوني سعيد يسلم عليك يا ماما ...بعدين قالت لي تسلم عليك و تقولك وحشتنا يا ولدي ما تزورنا ليه . وثواني وقلبها يقول والله ما تسلم عليك ولا شئ إلا قاعده تخاصم عليك عشان ما خليتني أحضر عزومة أخوي أمس , رديت يا سوسو بس هذه مو عزومة ! هذه بس أمك جات يعني فاضيين إحنا نقعد نسمر لآخر الليل في وسط الأسبوع !
صرخت في وجهي لا يا سعيد .. ما قلت شيء إيش الكلام دا ..
رديت عليها لا تكملي أرجوك خلاص ما أبغى أسمع أكتر وأكتر ...ارحموني
وفتحت عيوني من التخيل المرعب دا وقلت أحمدك يارب إني ما بسمع حقيقي و خلي كل واحد يخبي اللي يبغى في قلبه دامه مستور .
وللمرة الجاية أسيبكم في وداعة الله

Comments (6)

On 12 مارس 2012 في 11:53 م , وفاء يقول...

حلوه , فعلا لو يعرف الانسان اللي في القلوب كان انجن لو كان حساس بس لو قلبه قوي اكيد راح يستفيد ومحد راح يقدر يغشه وكمان ممكن يسرق من افكار الناس لما يشبع .

 
On 13 مارس 2012 في 12:51 ص , الأديبة / فاطمة البار يقول...

اهلا وفاء ....نعم الامر صعب جدا ومهما بلغ من الذكاء والحصافة ان يستفيد من غيره لكنه سيتعب نفسيا من مخالطة البشر
شرفتيني صديقة المدونة الدائمة

 
On 13 مارس 2012 في 8:48 ص , غير معرف يقول...

طول عمري اتمنى يكون عندي الحاسه السابعه واعرف كل واحد اش مخبي في قلبه.. بسبعد قصه سعيد حسيت ان الموضوع فعلا متعب ويخوف..
بس مازلت اتمنى هالحاسه في مواقف معينه=)
ام حامد

 
On 13 مارس 2012 في 12:57 م , الأديبة / فاطمة البار يقول...

اهلا ام حامد
الحمد لله اننا لا نقدر ان نسمع ما في القلوب ولله في ذلك حكمة والا لما عشنا بسلام فالقلوب والله المستعان تحمل الكثير ولو في لحظات الضعف .
سررت بمرورك

 
On 21 مارس 2012 في 2:29 ص , غير معرف يقول...

فعلﻵ لو عندنا هذي الحاسة منعتنا من مخالطة الاخرين واتجنبناهم ويصل الشحناء والبغضاء بيننا وهذه حكمة من الله حتى ابصارنا لا ترى كما ترى الحيوانات لأن ابصا هم ترى الحن والشياطين ولو كنا مثثلهم اتجننا الله يعلم ما في القلوب ام علي

 
On 21 مارس 2012 في 1:23 م , الأديبة / فاطمة البار يقول...

أهلا بك أم علي
أحسنت لو كانت موجودة لما عشنا بهناء فالحمد لله على حكمته في الخلق
شرفتني يا فاضلة .