صلي يارب على نبيك الهادي وآله وصحبه

وبعد الولادة يا كرام فرحنا و تمت فرحتنا وزغردت ليالي الأنس

رجعنا لبيتنا ومعنا صغيورة حلوة ولزيزة ...تشبه أمها لا أحلى منها طبعا  :)

المهم انا ماسك إيدين سوسو حسب تعليمات أمي الله يحفظها لي و أمها ماسكة باليد التانية

لما جلسناها على سريرها وتمددت عليه وحطت همها اللي شالته تسع شهور وشلته انا معاها و غلبتني حتى أصير بابا.

بعد أسبوع يا جماعة زي ما تعرفوا قررنا نعمل السابع

لكن تعالوا ما حد منكم سألني إيش سميت بنتك  ؟؟ انتو مش مهتمين بالقصة وإلا إيه ؟!

أقلكم ...من يوم ما كانت مرتي في الشهور الأخيرة وإحنا بنتخانق إيش حنسمي النونو

وبعد الولادة برضه ما استقرينا على اسم ...كل يدلي بدلوه وبرأيه ويخترع اسم

قلت لهم خلاص يوم السابع أنا حقرر الإسم المستخبي دا بعد ما أشوف البنوتة كويس وأشوف أي اسم يزبط عليها

المهم يوم السابع دخلت على سوسو وقلت ..إيش رأيك يا حبيبتي نسميها أمل

صرخت ..إيش امل !! لا مستحيل نسميها تالة .

قلت تالة !! مين ..!! الإسم مو حلو

قالت لا.. تالة

قلت لا ..امل

تالة ..أمل ..تالة ...أمل ...تالة ...أمل

وفضلنا تالة أمل تالة لما سمعونا الجيران , و تحولت التسمية لخناقة وتدخلت أمها تهدي بنتها وتهديني لكن أبو العفاريت ركبني

وقلت أنا أبوها ومسئول عنها وأنا ولي أمرها ووو...

وردّت سوسو وأنا أمها حملت فيها تسعه شهور وشفت الموت لما طلعتها للدنيا .. تبغاني أنسى كل دا ويضيع حقي أني أسميها ..

تالة

قلت ..امل

بعدين قعدت سوسو تبكي وارتفع صوتها خرجت وسبتها

وجلست في السيارة أفكر وأفكر قلت ما حتمّشي كلامها عليّ .. أنا رجال

ورحت الأحوال وكتبت اسم البنت في شهادة الميلاد أمل ورجعت بالورقة

أخذتها سوسو وشافت الاسم ورمتها على الأرض ..وهي تبكي مستحيل الظلم دا

طنشتها و شوي الا تقول ما ني مسوية سابع

قلت يا بنت الناس والمعازيم والضيافة والعشاء ..كله دفعت حقه

قالت براحتك وبروح بيت أبوي كمان

حسيت الدنيا تلف فيني يمين ويسار يعني حخسر حياتي وبنتي عشان الاسم بس برضه معند وقلت كلامي يمشي ..

سكت منها قلت ماني موديك

قالت حنتظرك  يعني ! ودقت على عمي " ألحقني يا بويا و قعدت تبكي "

وجاء ابوها وأبوي والتمت العيلة على المخاصمة ويهدوا فيها وشوي إلا البنت تبكي وتصرخ وا ء واء واء .. ههههههه طبعا هي

جوعانة لكن حسيت بكيتها كأنها جرس إنذار لينا وكأنها تقول يا مجانين تتخاصموا على اسمي خلوني من غير اسم أحسن

انتبهت وقلت ماشي ...بنتي أغلى عندي من كل خصام خلاص يا سوسو ..نسميها تالة بكرة أروح وأغير الإسم .

وزغردت أمها كأنه عروس دخلت وقالت أهو دا الرأي " بيني وبينكم فرحت لانتصار بنتها "

الحمد لله ان ربي هداكم يا ولاد ..

وأخذت سوسو في حضني وقلت سامحيني دا كان من الشيطان اللي وسوس لي وقال مشي كلامك أنت رجال وإلا الاسمين حلوين

زيك

أخذت تالة وبوستها على جبينها وقلت شكرا تالة أنقذت حياة بابا وماما

....

موعدي معاكم الأسبوع الجاي انتظروني

Comments (6)

On 13 نوفمبر 2011 في 8:28 ص , غير معرف يقول...

الله عليك ربي يخليك جميل العرض وسلس وسهل ومناسب من تقدم لتقدم

 
On 13 نوفمبر 2011 في 11:39 ص , غير معرف يقول...

ههههههه الله يهديها ساره اسم امل احلى من تاله;-)
جاري الانتظار..
ام حامد..

 
On 13 نوفمبر 2011 في 1:08 م , الأديبة / فاطمة البار يقول...

اهلا بك غير معرف ..
سعدت بوجودك
اشكرك

 
On 13 نوفمبر 2011 في 1:09 م , الأديبة / فاطمة البار يقول...

مرحبا بك ام حامد ..
امل والا تالة
كانت وقفة اتمنى ممن فقد حياته الزوجية بسببها ان ينتبه
شاكرة متابعتك

 
On 14 نوفمبر 2011 في 5:39 م , غير معرف يقول...

لحمدلله انهم سمو البنت اخيراا

بس الله يهديهم ليه ماسموها لوله مو بيكون احللا

 
On 14 نوفمبر 2011 في 6:29 م , الأديبة / فاطمة البار يقول...

اهلا بك
ان شاء الله البنت الجاية يسموها لوله
كوني متابعة لتعرفي
منورة