أهلا بالحبايب الغاليين , اليوم رجعتلكم  بعد غياب سيطر عليّ , أصل أنفاسي انكتمت شوي في الأزمات اللي بنعيشها دي اليومين ماحنا عارفين نشرق وإلا نغرب كل يوم بنسمع أزمة شكل ونقول لنا الله يا أمتنا وربي لنا الله .

اليوم ححكيكم عن تالة , دي البنت غلبتنا كتير من يوم يومها وهي نكدية وتبكي , ما صدقت  أنها تخلص الأربعين قلت يالله حتعقل وقلت لسوسو خلاص دحين هي عاقلة  مش كدا ,ردت علي والله إنت المجنون !!عقل إيش اللي بتتكلم عنه يا بو الشباب مو شايفها طرية أمسك بس .
وتركتها لي قال حتغلق شوية شغل بيدها وصرت لحظتها ماما ..قلت يالله يا سوسو حجرب شعورك وأصير ماما ..قالت حتبكي , قلت والله قدها وقدود  يعني معقول رجال يبكي من أبسط حاجة .. أم بس أم مش أكثر .

إحساس غريب وفريد يا جماعة وأنا بشوف وجها الطري والله براءة يا تالة تجنني ..وقرصتها قرصة صغيورة في خدها وإلا تبكي انفجعت بس يا روحي بس وما في بس عندها .

سمعتها سوسو وجات تجري إيش عملت في البنت ؟ وضمتها لصدرها وبدأت تالة تهدأ .

أنتو عارفين لحظتها قلت لسوسو..والله إني حبكي زيها ...أحتاج لضمتك يا سوسو ..ارحميني دا من يوم حملت وأنا شقيان بس 

ردت علي..أقول بس انتبه لها ولا تبكيها ثاني أنا حخرج أسلم على أم وصفي قالوا سوت عملية ,أنت قلت أنك أم اليوم ...وشكلي
ورطت نفسي من جيث لا أدري :( .

أم وصفي مين وبنتك حتسبيها يعني أعمل فيها إيه لو لا قدر الله و إلا إذا جاعت ..

حطت لي حليب وموية وحطت البتاعة حقها وقالت كدا كدا ويصير حليب ولا تخاف أنا مشبعتها دحين ولو لا قدر الله شوف شغلك عادي عن إذنك مش حتأخر لا تخاف .

وخرجت وسابتها لي..حسيت أني مسئول بشكل مو طبيعي وقعدت أهرجها وألعبها وهي ما هي دارية إيش بقول .

توتو ..حبيبتي ...نننننو وهي تشوفني وتضحك وأنا قلبي يتنطط ماني مصدق والله أحس الغرفة امتلت إشعاعات محبة ووناسة .

وهي تضحك وتضحك وإلا أشم الريحة يالهوي هو أنت ما تضحكي إلا على خيبة .

وربع ساعة كلها تضايقت من نفسها وصارت تبكي والله ما عرفت أعمل  إيش  , قلت والله لأسيبك لأمك المتسيبة دي لكنها كسرت خاطري قلت أنا اللي قررت أصير أم ,جهزت العدة " مناديل منظفة ..حفاظة كريم ...الخ " وانطلقت في رحلة العذاب المهين وخلصت و عضلات ظهري انشدت , و رحيتي طلعت , و نفسي قلبت والدنيا حوسة حواليي..إلا وتشرف سوسو ..وقعدت أصرخ وينك يا بنت الناس وينك سبتيني , غرقت في بنتك كيف أنت متحملة طول النهار القرف دا .

بصت لي بعيونها وقالت " حس ولو مرة عشاني ..شوف كيف الأم بتتعب وتجو إنتو آخرا لنهار وتقولوا ما سويتي شئ ..شايف يكفي مقابلة العيال ناهيك عن باقي البيت والشغل ..ها يا سعودي..تبدل الأدوار ..؟!

صرخت ..لا أرجوك ولو لثانية ...خلاص فهمت والله فهمت .

أشوفكم تاني ولداك الوقت تقبلوا تحيات أبو السعود

Comments (6)

On 24 نوفمبر 2011 في 12:06 م , غير معرف يقول...

ههههههههههه من جد الرجال لازم يجربو عشان يحسو..
جاري الانتظااااار..
ام حامد

 
On 24 نوفمبر 2011 في 5:06 م , الأديبة / فاطمة البار يقول...

لو فعلوها أم حامد لشكروا للزوجاتهم وبالغوا في الإطراء لهن
قال رجل " دعوني أعمل 24 ساعة ولا تتركوني ساعة في البيت " .
مرحبا بك ياأختي .

 
On 24 نوفمبر 2011 في 10:02 م , غير معرف يقول...

من جد يافطوم لو يعيشو يوم واحد دور المراه لحسو بقيمتها بدل مايفلحو بالهواش

سوان

 
On 25 نوفمبر 2011 في 3:57 ص , الأديبة / فاطمة البار يقول...

اهلا سوان
لتقترحكل زوجه على زوجها تبادل الادوار يوم واحد حتى يشعر بها ..

 
On 25 نوفمبر 2011 في 11:26 ص , غير معرف يقول...

في انتظار سعودي المسكين هههه الله يكون بعونه





2lah ndoo

 
On 25 نوفمبر 2011 في 5:48 م , الأديبة / فاطمة البار يقول...

اهلا بك وبانتظارك ..