أهلا بيكم كلكم أكيد مشتاقين لي بعد غياب أسبوع أفتَرَت فيّ قلب النسايم وعايزة تؤدبني قال...

المهم صلوا على العدنان وتعالوا أقولكم كيف صرت بعد الزواج

محلو ومنفوخ ريشي قعدت كدا يمكن شهر يادوب كملت وبعدها أتقلبت الآية وصرت بشوف حاجات غريبة وكل يوم شِكل تاني...مرة

من المرات كنت أتصل على........والا اسمعوا المكالمة بنفسكم

- ألوووو ....السلام عليكم ياست الكل

كيف حالك وحشتيني موووت

- الحمد لله وأنت كيفك يا قلبي ياربي تكون بخير ..الله يسعد ويحقق أمانيك وأحلامك

كم باقي وتوصل

- ان شاء الله نص ساعة يا غالية وأكون عندك .

ترررررن ....طيب خليني أشوف الجوال إزا سمحتي لي مو راضي يسكت أزعجني مررررررررة

- ألووو ...

- مساء الخير

- نعم ...خير... ورايا ورايا إيش تبغي

- سلامتك وكبر عمامتك وسعادتك بين جماعتك

- أهلا أهلا يعني والله تعرفي تتكلمي

- تعلمت منك يا تاج راسي

- تاج راسك إيه ... دا راسك يطيح الحجر ..كيف حيمسكني بس ..!!

- لا ..مو لها درجة خلاص سوييته صار معدل من غير ميلان

- هههههه ..بالله اسمعي ماني فاضي لهرجتك الهبلة هادي

تبغي حاجة خلصيني بسرعة واوعي تكون طلبات لاني قرفت وزهقت ومالي خلق أخش البقالة

- لا يا حبيبي ما عندي طلبات لا تخاف أنا أطلبك أنت

- يادي الليلة اللي مش فايته

- قلت لك من الهرج الفاضي ..هات من آخره

- ليه يعني من آخره مو قلت لك ما أبغى شئ

متى حترجع

- قصدك متى حتنيل وأخش الجحر

- طيب ...لا تعصب متى حتخش الجحر الدافي

- والله إنه جهنم الحمراء ..ماني عارف ..أول أخلص دوامي بعدين يصير خير

- أكيد رح يصير خير ..طيب ما حتمسعني كلمة حلوة

- يا ولية أنت شاربة حاجة وإلا إيه ...ارحميني من المكالمة هادي

- أرحمك مني ..لا ..لا ...أنت تمزح ..أحد يسمع صوتك ويقفل

- أنت هبله اليوم وإلا إيه ..أنقلعي من قدام وجهي

- حبيبي ..مو قدام وجهك ..أنا عند باب المكتب ..ممكن تفتح لي

- ايش....

-هلا وغلا وسهلا بنوري شرفتيني ...

معقول الجمال كله هنا وأنا بقول ليه المكتب اليوم ريحته عطر فواح والنور مضوي الجناح والشئ خطير والنور لاح

- ههههه يا مكار دحين كل الكلام اللي قلته دوبك وشكلك قرفان من خلقتي ...ايش اللي قَلَبَك بس

- يا بنت الناس ..وطي صوتك بس ..ترانا في شركة والحيطان لها آدان ..تبغي أحد يسمع فضايحنا بس

- يا شيخ ..يا مدير بس ..يعني قدام الكل يا محلاك يا عيني وفي البيت عقلك مطين و تفكيرك بليد

- اسمعي ..اللي تبغيه موافق بس وطي الصوت لا تفضحيني قلت لك ..

- طيب وقع على الورقة دي بس وأنا حخرج بأدب

- طيب ..هاتي ..شكلك يا امي دعيت علي اول المكالمة

- ايش تقول

- سلامتك يا روحي ..اهرج نفسي ...اصلي هلوست من فتنتك سحرتيني

- طب هات ..الله يقلع شكل ابليسك بس

حتلاقي الورقة على الطاولة اليوم ..تجيب كل اللي فيها والا

تلاقيني بكرة هنا

أنا خارجة عند الجيران ..فهمتني

- أكيد فهمتك

- ألو ..أمي كيفك ..معليه بعتزر عن الجية اليوم ..عندي ظرف صعب شوي في الشغل

- ياولدي صار لك شهر بتعتزر كل يوم بشئ

طيب ربي يفتحها في وجهك ويبارك في عيالك

معليش حنتظر قلبي مفتوح لك اي وقت

- طيب ادعي لي بصدق يا أمي تراني تعبان

- إيه ياولدي يعني بدعي لمين غيرك

أنت ولدي الوحيد وقلبي الباقي هنا وخواتك كلهم ربي يسعدهم مع أزواجهم

- أمي ليه زوجتنيني بس

- ايش بك تبكي.... ايش جرى لك ....زوجتك عشان افرح فيك

انا اجيك المكتب دحين اشوف ايش بك

- لا ...لا تتعبي نفسك ...المكتب مخلص دوامه

حمر عليك ان شاء الله

- لا تنسى تجيب سارة معاك

- سارة ..لا مستحيل سارة

- ايش بها لا تكون تعبانه بنت الناس انتبه لها

- تعبانه ..لالالا هي عند الجيران بس

اقولك يا امي ..

المدير على الباب

- المدير مش انت المدير

لا اقصد ...الفراش مع السلامة

Comments (4)

On 19 أكتوبر 2011 في 2:29 ص , غير معرف يقول...

روعه. إلي بعده
خوخه

 
On 19 أكتوبر 2011 في 9:23 م , الأديبة / فاطمة البار يقول...

يا هلا بعروستنا ...
انتظريني بعد اسبوع
هلا بك

 
On 20 أكتوبر 2011 في 7:24 ص , غير معرف يقول...

جاري الانتظار..
ام حامد

 
On 21 أكتوبر 2011 في 1:27 ص , الأديبة / فاطمة البار يقول...

يا هلا فيك ام حامد تشرق نسايم بحلولك