صل يا رب على حبيب القلوب أحمد المختار ...كنت أقلكم آخر مرة عن قبل العرس تعالوا بينا نكمل ..

وقبل عرسي يا جماعة الخير كانت حكاية كشتي مع أمي  اسمعوها ...

قالت يا ولدي باقي يومين روح صلح شكلك واحلق الكشة اللي فوق راسك هادي

انفجعت وقلت  ايش يا أمي أحلقها ليه ...كدشي أحبه مستحيل أتنازل عنه

لكنها ردت.. ياولدي عيب إيش بدك الناس  تقول علينا ..حتحط الشماغ كيف ؟؟ وحتى العمة حتصير كأنها برج على راسك

والحرمة حتنزعج منها ..

قلت يا أمي.. طيب ماهي صابره عليها أيام الملكة

 لفت لي أدوني ...يا ولدي الملكة غير والعرس غير..خلصني وشيلها ورتب نفسك

 جيت أهزر معاها ...أقلك أبوي إيش كان لابس يوم زواجكم

وحصلت لي كلمتين ههههه" انقلع بس ..بلا قلة أدب "

 قلة أدب إيه يا أمي ..

مالك عصبتي عليّ ...طيب أنا رايح أشيل الكشة تؤمريني أنت يا أحلى أم ...

أسمعني ... وأعمل لك تنظيفات لبشرتك وزبط المسامير اللي في وجهك

مسامير ... قصدك الشنبات ههههه دا أنت دمك خفيف ...

يابني غور من وجهي شايفني سارة والا إيه..
 قلتلها صحيح أمي  إيوه بس كلكم حريم ينفع المزح معاكم وعقولكم صغيرة

وشكلي زودتها حبتين معاها والا بتقول لي " ايش أنا أمك عقلي صغير ..ربيتك زين أستاهل منك ..امشي بس لا تشوف شئ ما يسرك"

-ــــــــــــــــــــــ


ورحت أتدرحرج للحلاق ومالي نفس أبدا بس ايش بدي أعمل في الورطات اللي وقعت فيها وحده ورى تانية يالله ننتج بسوسو

دا قلبي حينقطع من المفاجأت والصدمات كل يوم ايشي أمي وايشي سوسو وايشي العالم ....

 المهم لا ابعدكم عن الحلاق

والله من غير مزاج أكلمه ..بس المهموم ..

- كيفك يا محمد

- مرحبتين بيك ..شو بدك تعمل اليوم

- أقلك أمي وصتني بشئ مميز ومختلف بتاع عرسان

- ححتجوز ..والله ألفين مبروك أنا حخليك وااااااو

- وااااااااااو ..طيب شوف شغلك المهم حاجة تبيض الوجه وتبيني عريس

- أعملك سكسوكة وإلا نخليها ممسوحة وإلا شو رايك أخليك متل ما بتقولوا لحية غانمة

- أقلك يا محمد لا تهلكني وسوي اللي تبغاه ..خليني جميل ومورد

- خلاص سلمني نفسك بس حعمل لك حمام شامي وأعمل لك قصة شعر تجنن وتلف العقل لتلف عقل العروسة وأعمل لك ...يوه لا

تدوشني اعمل لك واعمل لك و سوي اللي تشوفه يزبطني وأصير جنتل  .

و خذ راحتك المهم النتيجة ولا يهمك المبلغ شوف شغلك

وخرجت من عنده واحد تاني لو شفتوني ما حتعرفوني

ـــــــــــــــــــــــــ

- اللهم صل على محمد ايه الجمال هدا تجنن يا ولدي

بشويش امشي تعال أبخرك بس اليوم عيدك ويومك السعيد

- لووووووووووووووووووووولي مبروك ياولدي ...

- الله أمي وأبوي في أحلى يوم ما عمري شفتهم فرحانيين كدا

- مبروك يا سعيد يا ولدي

مبروك سعيد

الله يسعدك يا أحلى أخت .

- والله كلكم سعيدين مرة الله يسعدني بحق اليوم

يعني كم سعيد عندنا يا ولدي ..وقطرت دموع من عيون أبويا

أبويا ايش بك تبكي ...لا لا.. حقك عليّ أنا بحُبكم كلكم ومش حسيكم

وإلا دي دموع الفرح  !  يا ولدي اتزكرت إخوانك الله يرحمهم و تمنيت اليوم دا لهم ..

يالله خليني افرح  وربي يبارك فيك وفي عيالك

واخترقت كلامنا زغرودة أمي وهي تقول لا تنكدوا على عريسنا الليلة ..

لوووووووووووووووووووووووووووووووووووووولي


ــــــــــــــــــــــــــــ

ويوم دخلت يا جماعة وشفت سوسو طار عقلي كانت ملكة الحسن كله وشربتها العصير وشربتني وأكلنا الكيكة

 و لبستها طقم الدهب  واتصورنا زي بقية خلق الله ويا إنها المصورة اللئمية لعبت فيّ يمين.. شمال

مش عارف ايه ...مش عارف ايش لما قلت ستوب ...

وبعدين قالوا يالله..

نقزت حسبت على الفندق اتاري ورانا حمل كبير

قالوا على الزفة ...ونشف ريقي ساعاتها و حست ماني عارف أزبط حالي ..

أصلي ما بحب الفجعات هذه وأمي ما دربتني على

المشية دي اللي بيقولوا مهمة مرررة لكن قلت بسم الله

وقلت امشي حالي بكلمتين لحبيبتي زوجتي أسلي نفسي على بال ما تشك تشك تخلص  واحنا واقفين على المدخل.

وانطفت الأنوار و ساد صمت رهيب في المكان وأنا بقول

وااااو سارة تجنني ..إيش الحلى والجمال هدا وين مخبيته بس قال أعمل نفسي مرتاح ومطمئن وربي عالم كيف جواي يرتجف زي

السعفة ...

 سعيد مو دحين لا تحرجني ما أقدر أتحمل

طيب ..زي ما تحبي يا عسل دا اليوم اللي كنت أتمناه من زمان ..


ورجعت أقوي عزيمتي وأقول لها  تُحبيني يا سوسو...

 وهي مكسوفة تقول .. يوه قلت لك ...بعدين جنني كسوفها ساعتها

حبيبتي .. أبغي اسمعها دحين

 أكيد حتسمعها ..

وزدت شوي يعني  ما حتقوليها 

... بعدين  خلاص قلت بعدين

ورضخت وكان من رضوخاتي المتمددة في حياتي ... طيب بعدين بعدين ...وبعدين قريب

ويا جماعه صارت تهمس لي ... اهجد الناس تشوفنا في الزفة دحين وعيونهم تراقب خليك جنتل وابتسم بس

... طيب وليه دخلوتني  دا أنا ما بعرف أمشي عدل حتى

قلت لك إهدأ وزي ما فهمتك قبل خطوة خطوة ووزع ابتسامات بس فاهم ياويلك ازا غلطت

 ...يا ويلك يا سعيد الحرمة تهددك من هنا قبل أي شئ

:( الله يستر وقالوا الجواز حلو

أما نشوف آخرته ..

ومشيت ياجماعة الخير وانا كلي ارتعش وانتفض من جواي ورجولي مو شايلتني لكن سارة ساندتني كتير وجلسنا على الكوشة

والعيون تبصبص فيني وفيها وحريم يتهامسوا و أنا بشوف عيون ملونة وعيون مفرقعه من المكياج وأقول لسارة مالهم كذا بس

هي حفلة تنكرية وإلا إيه ... قالت لي لا تشوف أحد استحي أنا جنبك , طيب كيف ما تبغاني أشوف احد وهي اللي مدخلتني المكان

الموبوء بالنسوان دا ....حد يفهمني يا جماعة ..!!

يالله شوية وقعدت أغني بصوت هامس ما يسمعه غيرها وهي تقول والله فضحتني خلاص روح

قلت و أنت ما حتيجي معاي , قالت شوية أرقص مع صديقاتي و حبايبي وأجيك مستعجل على إيه يعني

صحيح يا مغفل يا سعيد مستعجل على ايه .. كنت أهرج نفسي .. 

ـــــــــــــــــــــــــــــــــــــ

وبعد ساعتين عذاب ومزح تقيل من أصحابي و أعمامي  وتلطيش كلام كأنه ماحد حيتجوز غيري في الكون ..

قال أبويا يالله ياولدي أتوكل على الله وخذ مرتك السيارة جاهزة حيوصلك ولد عمك منصور

قلت لا شكرا لا منصور ولا غيره أنا أعرف أسوق هاتوا المفتاح

- هههه دحين سعيد ما يبغى أحد وخروا من قدامه وأدوله المفتاح بس

وركبا لوحدنا ومشيت أسوق وأنا مش حاسس بنفسي

بديت أخدر يا جماعة والله ما نطقنا حرف

مش عارف شجاعتي راحت فين وكأني ما بعرف سوسو ...

وصلنا  الفندق وفتحت الباب ونزلت أميرتي وعطيت البني آدم اللي بيشتغل المفتاح يركن السيارة وطلعت معها ..

دخلت الحلوة  سارة وقفلت الباب ماني مصدق نفسي إني معها لوحدنا كدا وشكلي زي الكورة المحذوفة ما ني عارف أوقف حركة

وأتهبب في محل وسبت البنت واقفة وبعدين انتبهت قلت يا روحي خشي برجلك اليمين ..

أهو يوم مناك حل واتزكرت الدعاء اللي قاله أبويا وصاني بيه ومسكت راسها مع أن التاج غزغزني لكن تحملت شوية وقلت

- بسم الله

اللهم اعطني من خيرها وخير ما جبلتها عليه واكفني من شرها وشر ما جبلتها عليه

الا انفجعت وهي ترد عليّ ...

- طيب شايفني كلي شر خذ يالله

اللهم اعطني من خيره وخير ما جبلته عليه واكفني من شره وشر ما جبلته عليه

- ماشي ياعسولة

أنت الليلة شئ ثاني وحتكوني شئ ثاني

حتتلصقوا  فيّ برضه . ...يوه أنتو مستنيين إيه...

 روحوا فصل ثاني دحين اختشوا شوي


Comments (4)

On 8 أكتوبر 2011 في 12:03 م , غير معرف يقول...

هههههههههههههه
رووووعه..
اكيد ساره لها دور كبير في الاجزاء الجايه
جاري الااتظار....
ام حامد..

 
On 8 أكتوبر 2011 في 8:09 م , الأديبة / فاطمة البار يقول...

اهلا ملئ الكون الجميل بك يا ام حامد
ما أروعك من متابعة تسعديني دائما بحضورك
ستكون سارة بطلة مميزة لكن لن تكسب الرهان فسعيدة لا مثيل له

 
On 12 أكتوبر 2011 في 3:26 ص , Unknown يقول...

إستمتعت كثير بهذة القصة
ومن إعجابي بها
طرحتها بأسمك
في منتداي
http://tihama-yemen.com/vb/showthread.php?p=93234&posted=1#post93234

 
On 12 أكتوبر 2011 في 7:27 م , الأديبة / فاطمة البار يقول...

اهلا بك اخي الصقر ...
اتمنى عليك وضع الرابط للموضوع
...وارجو ان تنال القصص الفصحى رضاكم
كانت تجربة العامية مقتصرة على نسايم فقط لكن لا باس ان نشرتها...انتظر باقي الاجزاء فكل اسبوع جزء والحلقات طويلة سنمرح كلنا مع سعيد